中環遮打大廈一樓商場最近充滿咖啡香氣，事關之前賣名牌朱古力嘅舖位，轉咗賣咖啡。呢間咖啡店特別在唔係連鎖店品牌，而係一位「80後」番書仔Derek跟朋友夾份開嘅，大約100平方呎舖面，主要做外賣生意，方便附近返工嘅中環人嗱嗱聲買杯咖啡叉電。
Derek生於小康之家，喺英國讀大學，主修建築同埋法律，但係畢業後都冇乜點樣發展呢兩瓣事業，反而走去開咖啡店。中環咖啡店多的是，想突圍而出當然要諗計，佢呢間嘅賣點，係佢哋買生咖啡豆返來自己炒，再新鮮烘焙，另外仲有滴漏咖啡提供，滴漏一杯需時3至4分鐘。
咖啡店最多人幫襯嘅時間分別係晨早9點中環人返工前後，同埋食晏之後，呢兩段時間，咖啡店前面都企滿人。唔講唔知，晨早買咖啡嘅人都有不同習慣，有啲人鍾意直接買完上樓開工，有啲人就鍾意先上樓放低袋，現一現身，畀老闆知道佢返咗工嘞，然後再落樓買咖啡。
