人稱「藍爺」嘅前民政事務局局長藍鴻震（圖）退休之後少有出席公開活動，佢噚日以國際專業管理學會會長身份出席港台節目《城市論壇》。嘩！藍爺「出山」，好鬼「搶眼」，皆因佢抑揚頓挫嘅發言每句都配合獨特嘅手勢，確保everything under control！
不過藍爺可能偏重發言時嘅做手，忽略咗內容嘅真確性，批評同場嘅和平佔中發起人戴耀廷（Benny）身為教授「叫小朋友準備犯法」，Benny即時反駁話從未叫過年輕人犯法，佔中由開始至今只叫40歲以上嘅人考慮是否參與。藍爺此時就話40歲以上呢個訊息唔清楚，希望佔中澄清吓。Benny即時扯火：「藍先生喺公共空間講嘢，你有責任搞清楚事實先去發言吖嘛，冇理由我去澄清，我已經講咗啦！」不過藍爺仲死撐話香港有言論自由，佢都係誠懇講出自己感覺喎。闊別一排，藍爺嘅跳躍式思維依然不變。