豬肉股萬洲國際（288）減價捲土重來，明天截止招股，呢隻股喺投資銀行界引起嘅其中一個吹水位，就係佢今年4月招股時破天荒簽咗29間投行做包銷商，陣容鼎盛過頭，反而上唔到市，今次重提上市就剩低摩根士丹利同中銀國際兩間。據聞，公司管理層係吸取教訓，於是將上次拍心口話估值高都上到市、聲稱手上有好多基金落飛嘅投資銀行全部踢走。
萬洲舊年舉債買入美國最大豬肉食品企業Smithfield，挾住全球最大肉製品生產商之名上市，未上市已經係威係勢。據聞，多間投行為討好萬洲管理層，今年初幫公司招股時大都只說好話，有一間美資投行更加一開始就話拎到幾十億美元嘅基金定單，搞到公司以為自己真係皇帝女。點知最尾基金定單冇晒影，公司仲要暫緩上市，𠵱家減價再來。