喺今夏巴西世盃8強戰俾哥倫比亞後衞辛尼加撞傷背脊嘅尼馬（右），預計養傷40日左右就可以好番並進行操練。呢位22歲巴塞隆拿球星冇留喺屋企休息，反而約埋女友布魯娜同埋朋友去西班牙度假，而且仲出海玩㖭。不過，由於佢要戴住個腰封保護條脊椎骨，所以唔可以落水，淨係可以喺架艇上面乾煎，雖則係咁，但話晒可以同陽光玩遊戲，佢都似乎好享受。雖然佢可以出嚟玩，但係佢個腰封都好大嚿，包到上胳肋底咁滯，搞到佢行動好唔方便，成個機械人咁。
至於尼馬嘅巴塞隆拿隊友美斯亦去咗鬆一鬆，去咗意大利玩，仲同佢另一半、着性感T-back嘅安東莉娜玩水上電單車（小圖）。話時話。水上電單車對職業球員嚟講屬於危險活動，唔知呢位幫阿根廷拎咗今屆世盃亞軍嘅27歲球星，之後返去魯營報到嘅時候，會唔會俾新帥安歷基捉去照肺呢？
