美國總統奧巴馬近月遇上不少麻煩，內政有邊境偷渡兒童/移民風波，外交有普京背後指揮烏克蘭東部武裝分子作反，中東有盟友以色列與巴勒斯坦激進派哈瑪斯交戰，不少平民死傷，樣樣都係大件事，但每次有大件事發生，佢嘅公關死對頭霍士電視就會挖苦佢，「咁啱嘅，總統又去咗參加籌款活動，唔得閒理會國家大事！」
籌款即係出席民主黨人嘅餐會、晚會，用總統面子幫手打商界心口泵水。民主黨籌款有三枝大炮，就係奧巴馬、克林頓、希拉莉，三人同有號召力，可保證財源不絕，但民主黨仍然不敢掉以輕心噃，因為今年華爾街大亨改為支持共和黨，據金融時報引述官方資料，四年前國會中期選舉（2010），民主黨得金融界半數捐款（53%），共和黨只得到46%；但今年至上月為止，共和黨得到金融界政治捐款嘅62%，民主黨只得38%。一位對沖基金富豪，Citadel總裁Kenneth Griffin（福布斯富豪榜上有名）過往經常捐款俾民主黨，但今年淨係捐俾共和黨，到5月31日為止，已超過八十萬美元，故此奧巴馬等民主黨人那敢怠慢，那管得歐洲中東局勢緊張，還是籌款打競選戰要緊。
美國對政治捐款有明確法律，捐款過程十分透明，而且有一個大優點，就係商家無論捐款俾甚麼人，選舉後不會有秋後算賬，那似得香港咁，既無政黨法、無政治捐款法規，又有北京老大吼實，邊位商人敢膽公開大方咁捐款俾民主黨就會受到特別關注，以後入大陸做生意就零舍、額外、困難！香港商人捐錢俾泛民，被逼好似做賊咁，要保持神秘，唔敢對人講，反之捐俾民建聯、工聯會就可以大大聲，驚死北京唔知，博取大陸生意可以更方便。今勻肥佬黎俾啲世界級/國家級黑客出手偷取電腦資料，捐款大曝光，建制派以為執到寶，乘機搞大，又話告上廉署，用英文兩隻字回應，so what？now TV 332台（七月二十四日）公佈當日民調結果，有72%觀眾認為黎智英捐款一事可以接受呀！橫掂有各路黑客高手吼到實，網絡上再無秘密可言，以後肥佬黎不妨效法Kenneth Griffin，每次捐錢便周街講，在蘋果日報賣廣告囉，順便叫埋民建聯、經民聯等等公開披露佢地收政治捐款嘅清單囉。最近有某政黨開始節省用錢，聽講主要理由係向商界籌款成功率大不如前，商界驚住該黨批評梁振英政府多聲氣一啲喎，捐錢俾佢就恐怕北京唔高興！香港幾時可以學得美國咁，捐款全無顧慮，就有真正民主咯！