最近同兩班學生飯局，可以話係散戶投資者的寫照，第一班同學日炒夜炒，你問佢哋點解個市升，可能唔係講得太清楚，總之有錢入就升，見突破就追，屬於「勢」派。而另一班學生較為學術派，早前問我買乜好，我話內房，但他們對大市半信半疑，又退市、又佔中、又反貪腐，唔太敢入市，現在再次問我買乜好，我都係內房，佢哋第一個反應係已升好多，唔太值博，這批學生屬於「價」派。其實，討論了幾十年，投資不離「價」與「勢」，價者價格低於價值也，唔抵唔買；勢者趨勢已成，買的人較進取，願意搶價，沽的人只係邊升邊沽，所以上升趨勢便形成。
那究竟價緊要還是勢重要？以我個人見解，缺水之時重價，水多之時重勢，因為缺水之時，大家手緊，勢道一成升了少少，已有人食糊，人同此心，大勢難成。相反，多水之時，大家問有乜嘢買，甚少問你要沽乜，重價者往往失諸交臂，幾次之後，唔難保會不問價追，人人搶上，唔易有平價機會，由5月升到現在，五窮六絕，原來係對淡友講的，大市升到上來股價仍平，未必是機會，一係就堅持睇「價」唔買，最多唔賺就算，要買的就只有趁勢，過去幾年內地控制銀根，箍得死死，所以跟勢炒者無啖好食，但最近似有放水迹象，到底「勢」派能否反敗為勝？主要取決定於「勢」能否持續。
內房有價有勢
「可以持續的勢」聽落好似只係事後先分辨得到，但其實有時一個趨勢展開，我們可以從常識加經驗去推論。譬如話，推動呢一波升市的兩大消息，係中央放水同取消樓市限購令，中央推出政策一向係有連續性同穩定性，極少反來覆去，之前係收水時期，就算股市跌、企業出現債務危機、經濟數據轉差，人行都繼續收水，政策唔會搖搖擺擺；而限購令其實都一樣，壓抑樓價時，就算偶然有地方政府因為「當地環境」而想放寬，都會好快俾中央打返轉頭。
以上中央政策都運作了一段長時間，而最近人行連續幾次暫停收水，明顯就係一個轉向訊號，加埋國庫現金定存招標同向國開行提供抵押補充貸款，誤讀嘅機會應該唔高，只要方向一旦轉了，就會持續落去，唔應該成日疑心佢又行返轉頭。限購令方面，之前一個半個城市偷雞，最終都係要打回頭，但今次溫州爆出取消限購令，原來6月中已開始「只做不說」，近日更傳出仲有廿幾個城市都係咁，所以，圖表上內房股過多月前已升破橫行區，當時大家唔明，現在真相大白。
內房股勢道持續機會大，咁究竟價又是否好貴呢？如果大家搬出圖表，應該看到價位屬於近兩年的最高區間，非常唔抵，但睇價唔係睇圖，最低限度都睇市盈率市賬率，睇返兩者，其實都並唔偏高，即係話價唔貴兼且有勢，而上周五美股調整，仲唔係機會做番轉中期長倉，有價有勢，仲唔「架勢」？
張士佳