炎炎夏日行商場嘆冷氣，無啦啦做乜有個巨型金字塔？原來係來自巴西嘅國際殿堂級普普藝術（Pop Art）大師Romero Britto藝術展，佢仲帶埋總值成千萬港紙嘅珍藏品嚟香港。6,000平方呎嘅金字塔其實係個藝術館，設計概念源自Romero喺英國海德公園展出世界最大型金字塔裝置藝術。
成個金字塔表面，都係用Romero嘅名作砌成。館入面擺放咗Romero最出名嘅國際名人系列畫像，例如毛澤東、瑪麗蓮夢露、米高積遜同麥當娜；館外仲有兩座5米高嘅巨型貓公主同皇室狗雕塑，想感受藝術氣息，去觀塘apm啦，個展覽8月24日就完㗎喇。