北美今夏成為歐洲大隊主要熱身嘅地方，英超嘅阿仙奴亦唔例外，喺上周六就作客美職聯球隊紐約紅牛；不過，與其話呢場係兵工廠嘅熱身賽，不如話係前阿仙奴球星兼現役紅牛前鋒亨利嘅紀念賽仲好，因為球場入面唔單止有亨利巨大橫額，而且呢名法國前鋒仲交出靚助攻，助紅牛贏1:0。不過，36歲嘅亨利賽後就唔肯講自己今屆之後係咪掛靴。
交靚助攻小勝兵工廠
猶記得喺3年前嘅夏天，啱啱喺法甲尼斯簽到哥倫比亞世盃門將奧斯賓拿嘅阿仙奴，喺自己地頭同有亨利嘅紅牛打和1:1，結果俾紅牛捧走阿聯酋盃；3年後，阿仙奴熱身賽作客紐約紅牛一樣贏唔到，紅牛憑亨利助攻靚交曾經喺英超效力嘅前鋒巴利胡禮菲臘斯建功，紅牛以1:0勝出。講真，雖然阿仙奴呢場冇排強陣，一眾世界盃國腳好似基奧特同德國3子普多斯基等都冇隨隊，但場波仍有唔少熟口熟面嘅老朋友，除咗亨利同巴利胡禮菲臘斯之外，紅牛嘅中場卡希爾亦同前愛華頓嘅中場好拍檔、現效力兵工廠嘅阿迪達喜相逢。
紅牛總監侯利亞爆料
不過，場波嘅焦點當然係前鋒亨利。皆因紐約紅牛嘅全球總監侯利亞（即係前利物浦領隊）放風話，喺今屆之後會同紅牛約滿嘅亨利，好可能退休，所以在場嘅球迷都好留意亨利嘅一舉一動；而佢亦冇令全場爆滿嘅25,000名球迷失望，表現落力又交出靚助攻，喺57分鐘被換出時，更贏得全場球迷起立拍掌。
賽後阿仙奴領隊雲格亦盛讚呢名高足：「亨利無論喺球場邊度都咁危險，只要有少少機會，佢都可以把握；特別係當你同佢單對單時，你簡直冇得同佢鬥！」至於亨利喺賽後唔肯為自己嘅前途表態，佢淨係話：「吓？乜侯利亞咁講咩？呢啲嘢到季尾先講啦！」
「槍王」亨利就威盡，但細佢14年嘅兵工廠「煙王」韋舒亞就認真唔掂。韋舒亞雖然已就之前喺賭城食煙喪玩嘅事道歉，仲喺上周六場波擔正，但踢咗半場都冇乜表現，淨係識喺賽後抽水話：「我細細個就睇亨利踢波睇到大，佢係好特別嘅球員，從今日場波可以見到佢寶刀未老。」