F1匈牙利站上周六進行咗排位賽，平治車手羅斯保（圖）喺突然落大雨嘅Q3有驚無險，以1分22秒715嘅成績壓住力追嘅維特爾，周日將會今季第6次以頭位出賽。（now671及672台今日7:30pm直播正賽）
羅斯保雖然曾經因為天雨路滑而鏟出外圍，但係好彩絲毫無損，可以繼續作賽，最終以最快時間再攞頭位，但佢都係覺得冇得同隊友咸姆頓正面決鬥，點都好似唔夠喉喎。同樣係揸平治，「黑帝」今站就繼續黑氣纏身，喺Q1一開始就已經火燒後欄，架車因為油缸漏油而起火，令到佢記錄唔到任何時間，今站要喺尾2起步，仲衰過上次德國站嘅20位。除咗呢樣，咸仔架戰車嘅引擎同波箱要再換過晒，灰爆嘅佢就話呢個情況已經唔止係黑仔咁簡單喎，睇見佢個失落樣都覺得陰公。