【情趣馬賽克之正印發威】馬賽爆出艷舞片，令攣情背後的瓜葛一發不可收拾，馬賽繼哭喪自白愛錯人，昨日又在雜誌訪問自爆去年壓力爆煲時獲汪子琦送暖，深信彼此是「前世今生」的一對，為冧對方不惜放棄有米男友，可是注定緣份卻原來是「孽緣」的開始，繼汪子琦前日踢爆馬賽大話連篇，正印富婆Laura獲悉馬賽的剖白後，令她㷫爆再數臭小三，斥馬賽假情假義，處心積慮搶她「老公」。
馬賽和汪子琦的感情糾紛越揭越臭，上周流出馬賽的挑逗艷舞片，事後馬賽發聲明，指已報警及現身爆喊解畫，她解釋喝酒拍片是為滿足對方，又稱知道誰是拍片人及擁有片段。不過汪子琦前日則逐點反擊，揭馬賽自編自導自演拍艷舞片，又強調馬賽向來滴酒不沾，汪子琦還指曾見過馬賽向一位年過半百的香港男藝人發出曖昧訊息，更斥馬賽明知她已跟Laura註冊也做小三。
這段攣情羅生門，馬賽揚言不會被打倒，幾難都要跨過這個關口，馬賽接受雜誌訪問，聲稱曾因認定跟汪子琦的綠份是「前世今生」，事緣去年4月，播出孭飛劇集《神探高倫布》時，馬賽負評致壓力爆煲，那時汪子琦體貼關心而展開攣情，馬賽自爆不惜放棄拍拖十年、青梅竹馬的有米強國男友。去年馬賽曾被爆與東莞富二代簡建鋒過從甚密，可是馬賽卻改性向戀上汪子琦，甚至推掉工作，全情投入斷背情，結果事業、愛情、形象三失。對於馬賽的剖白，正印Laura不但不寄予同情，更對「小三」恨之入骨，Laura昨在電話接受本報記者獨家專訪，再數臭情敵。
L：Laura 記：記者
記：馬賽話《神探高倫布》播出時反應唔好，汪子琦對佢細心關懷，所以打動佢？
L：TVB喺2013年3月搞發佈會，我同汪子琦嗰日先識馬賽。《神探高倫布》係幾時播出？（編者按：2013年4月播出），我哋喺8月先去歐洲，咁佢係咪想證明佢同我哋一齊去歐洲係處心積慮為咗搶汪子琦？
記：馬賽話同汪子琦係前世今生注定嘅姻緣，你作為汪子琦嘅老婆，有乜嘢感受？
L：如果佢哋係前世今生嘅姻緣，咁我係乜嘢呢？唔通我係第三者呀？佢講呢啲說話根本就係揭緊我個傷疤，呢句說話係好hurt到我，係非常之hurt㗎。
上演緊「置諸死地而後生」
記：你同汪子琦喺邊度結婚？歐遊時同馬賽講咗你哋結婚未？佢有乜嘢反應？有冇祝福你哋？
L：之前係有註冊咗，歐遊嗰陣時佢（馬賽）都知，我覺得我哋係朋友，佢知道都好正常吖。佢當時仲祝福我㖭，原來佢媾緊我老公嘅時候仲祝福埋我㖭。如果冇記錯，就係有一日我哋食緊晚餐傾偈，就講我同汪子（汪子琦）都好多年，經歷咗唔少嘢，喺11年嘅時候喺美國註咗冊，當時佢仲話Laura你好勇敢呀，祝福你。其實𠵱家再諗番，我覺得都係一種傷害囉，佢其實係祝福我，問緊我嘅時候，佢已經採取動作去破壞緊，我覺得真係……唉……我都唔知點去形容。
記：汪子琦鬧馬賽戲子無情，丟盡全天下女人嘅面？
L：戲子就唔一定冇情嘅，但做得第三者就一定係。𠵱家咪做緊一套置諸死地而後生嘅戲囉。
記：馬賽話因對方認為唔拍片等於唔完全愛佢，所以馬賽為滿足對方要求所以拍片。有冇人要求過你拍片嗎？
L：冇，完全冇。
汪子琦用共同財產錢追馬賽
記：你會唔會原諒汪子琦，唔離婚？
L：過咗去啦，尤其係我今日又知道咁多嘢，點接受呀？破壞咗就破壞咗，分開咗就分開咗，呢個好難返轉頭。
記：艷舞片流出後，馬賽與汪子琦各有各說，馬賽自稱唔係為錢同汪子琦一齊，汪子琦又話被騙財？
L：貪錢係毋庸置疑嘅，之前咪畀晒證據你哋睇囉！同埋嗰啲錶、袋、衫、戒指、旅行等等，汪子琦啲錢其實係咪一半財產係我㗎？至於艷舞嘅真相，我同所有讀者一樣，我都想知。
記：汪子琦用你啲錢追馬賽？
L：夫妻啲財產係共有化㗎啦！
記：汪子琦同馬賽，邊個hurt你多啲？
L：我想講，一個攞把刀，一個攞把劍，點比呀？不過佢哋兩個人嘅內容，都有一個共通點，就係都承認咗呢段婚外情，點樣都係hurt緊我㗎啦。
採訪：皓騫