【本報訊】34歲的岑幸富，小提琴拉得煞是難聽，但聽着的人，無不動容。「曾幾何時，我以為再也做不到」。提琴全都「左手按弦，右手拉弓」，他失去的，偏偏是左臂。諗計改裝按弦方向，又土炮製作鋼夾義肢。一股儍勁，讓他成為「今生不作機械人夢想計劃」的得獎者之一，獲撥款支持完成學習小提琴的夢想。苦練三個月，這天，他彈出第一首歌，「唔好聽，但我知道，一定可以更好」。
記者：呂麗嬋
阿富的故事，其實很沉重。猝不及防的交通意外，令時年24的他驟失左臂。「嗰時做跟車，開工時遇到意外」。就像電視劇劇情，同家人飲完早茶，收到老闆來電，好心做替工，卻坐上死亡列車，「行經錦綉花園，切線時煞掣不及，同前車相撞」。司機本能反應扭軚自保，坐在另一邊的他，被車門活活夾着，當場昏迷。經搶救，一對腳保住了，左手神經線卻因傷得太重，需即時截肢。
「真係接受到咁嘅自己?」
「醒番時麻醉藥未過，隻手啲紗布包到好大嚿，個人迷迷糊糊，見到阿媽喺度喊，我仲反過嚟安慰佢……」別人驚訝他的冷靜，他說只因猝不及防，「冇咗隻手，感覺好離身，直至護士幫我除紗布洗傷口，血肉模糊，嗰時先識喊……」近距離看着只剩下一小截的手臂，他首次意識到，生活從此不再一樣，「我問自己：我真係接受到咁樣嘅自己嗎？」
以前認為理所當然的事，此後成了難題。只有一隻手，如何扭毛巾？簡單如戴錶，一個人做到嗎？指甲長了要剪怎樣辦？會有人願意請他工作嗎？一連串的疑問，讓自小性格開朗的他坐困愁城。丟掉全屋短袖T恤、大熱天時披着厚厚的恤衫；寧願兜路也不願在全身鏡前走過；與朋友見面不自覺側着一邊身子……
「總覺別人乾睜着斷肢，好難受」。自卑，像心中一隻鬼，如影隨形。「我用咗至少五、六年時間，重新去面對一個新嘅自己」。接受的過程，漫長而苦澀，十年間，他遇過惡意的嘲笑；但慶幸更多的，是溫暖的打氣。「阿媽同我講，話冇咗隻手，但起碼贏咗同個仔相處嘅時間。感激一班小學死黨，我讀書唔多，細個讀粉嶺啲村校，一班十幾人，咁多年都好好感情」。
放工後再辛苦都趕來相陪的哥兒，七嘴八舌陪他練習單手戴錶「絕技」，就像兒時放學後窩在一起的快樂時光。一班人笑笑鬧鬧，傷口，在不知不覺間，好像沒那麼痛。「我知道，只有坦然面對自己，先唔會辜負同你走呢段路嘅人」。要別人接受你，至少要得先接受自己，他決定行出第一步，在職訓局找到活動助理的臨時工；迪士尼請活動助理，他膽粗粗應徵。
上年，海洋公園哈囉喂招募臨時工扮鬼，薪酬吸引，他面試時甚至不介意以獨臂在人前載歌載舞，「佢哋唔理你係傷殘定健全，統統要考念對白同跳舞」。不求同情，只求信任。豁出去，斷臂沒引起不安，他破天荒獲取錄。「我獲派喺鬼屋扮木頭人，有個女仔摸到我嘅義肢，好驚訝咁同佢個朋友講，呢度啲化妝真係勁，連隻手都整到木頭咁硬……」暗自偷笑，他變回昔日愛捉弄人的小頑童。
參加三項鐵人賽 挑戰自己
意外前是運動健將的他，甚至首次參加三項鐵人賽，挑戰自己，戴上特製義肢，騎上單車。「以前覺得冇可能彈到小提琴，𠵱家覺得冇乜嘢係冇可能」。奇異眼光消失了，換回跑道上向他豎起大拇指的陌生人，「之前份工啱啱完咗，又要開始搵工，前面嘅路未必好走，但我知，有啲心結，只有自己先可以打開。」穿上短袖衫仍自信滿滿，阿富說。