林建明（大姐明）與鍾慧寧（肥豹）曾經一齊主持亞視節目《今日睇真D》，兩人私交甚篤。本月17日肥豹疑因受情緒病所困墮樓亡，終年43歲，喪禮將於下月6日萬國殯儀館設靈。大姐明昨日出席《心晴行動慈善基金》籌款活動，透露已經與肥豹丈夫馮永泉見面予以安慰，之後她再接受本報電話訪問時，直斥香港政府治療情緒及精神病資源不足，慨嘆謂：「有病要等一年半載先睇到醫生，都跳樓死咗啦！」
醫藥費昂貴
大姐明續說：「香港政府喺呢方面資源係唔夠，唔係個個可以應付到昂貴醫藥費，『心晴』已經出錢訓練咗10個家庭醫生，希望可以幫到有需要嘅人，但政府真係要做番多啲嘢，我哋得幾十個義工，做到嘅嘢有限。」大姐明指馮永泉在王維基的香港電視網絡（HKTV）任職，由於政府不發牌令他失業，她說：「我唔知道肥豹係咪因為唔想拖累丈夫，而做呢個決定，但點都好，到𠵱家我都唔明政府點解唔肯發牌，令好多人失業。」不過，本報獲悉肥豹與馮永泉並未有經濟問題，馮永泉本月11日已離開港視，亦一直都有其他兼職維持收入。
昨日大姐明在籌款活動上，指自己至今仍有吃藥穩定情緒病，並呼籲所有患病的人要做個乖病人，她說：「其實食藥就好似架車要入油咁，冇油咪要入囉，唔使驚㗎！肥豹就係有段時間唔去入油，結果再入院都冇用，最後都係揀咗呢條路。」問大姐明會否因為肥豹事件，加強呼籲藝人有需要可以聯絡她，同時不要諱疾忌醫？她透露一直都有藝人聯絡她，但基於私隱及專業守則，她不方便透露資料。
採訪：黃曉妍、小米
攝影：沈健程