左丁山極少參與公共機構活動，只曾經有一千零一次咁多，十零年前有一位官員失驚無神來電，請左丁山做一個政府資助機構嘅理事，於是做咗三年，但任內一事無成，發覺理事會內之政府代表有最大影響力（因資金完全由政府撥過嚟），啲非官方理事多數只能得把口，用錢咯喎，呢樣要跟政府指引，嗰樣要依照政府規則。總之一個「非政府機構」，就因為接受政府資助，實際上就係一個政府機構，私營機構靈活性欠奉，民間人士理事（如左丁山等人）講到口水乾都係有心無力。於是做滿三年之後，左丁山立即不再連任。
呢日成班老友吃晚飯，見到公職王W，佢退任後被委任幾份公職，其中兩份成日開會開到天昏地暗，辛苦過返工好多，但公職W又捱得住喎，呢位枵腹從公、努力為社會服務兼被民粹分子責罵之人，直情值得攞番一個金紫荊勳章。不過多口T在旁邊話：「而今有啲唔知對香港有乜貢獻之人都攞乜乜勳章，攞唔攞都冇乜所謂啦，唔駛恨！」公職W當然唔恨甚麼勳章，之不過昔日大家還有榮譽感之時，甚麼MBE、銅紫荊等等都叫做係一種社會認同（recognition），攞到點都有些少光榮感；今時代不同，如多口T話齋，攞勳章只要有一個人對你認同就得嘞，那理得其他人暗地裏噓聲四起，厚啲面皮咪去攞囉。
退休商務R原來又有公職，不過並非係政府委派，而係自願加入一個文化機構，為該機構注入一啲商界活力，商務R話：「好多NGO淨係識得捐錢，向外間籌款或向政府申請資助，但永遠唔會夠錢用，經年虧本，正是長貧難顧，啲老友叫我加入，叫我負責營運部份，睇吓有無辦法真正做到收支平衡，唔駛年年向城中有心大富翁沿門托缽咁辛苦。」商務R果然有心噃，NGO特別係文化機構，邊度識搵錢㗎，商務R一出絕招啫，立即招來批評，話佢手段商業化，未必符合文化原則，跟住監管人士（政府代表）又話因住傳媒批評呀，唔好搞咁多收費項目，如此這般，該機構個個月蝕本，難以向員工加薪，適逢市場好景，搵工容易，員工跳槽駛乜客氣噃，留低嘅人更加做得辛苦。啲社工文化人話事嘅NGO，有乜辦法唔係仰政府鼻息或向闊佬闊太折腰吖！