如果有睇筆者facebook嘅讀者，應該知筆者有去睇《華爾街狼人》真身Jordan Belfort個演講。可能係本人冇慧根，聽咗咁耐都只係覺得聽緊introduction。作為凡夫俗子，當然聽聽下就發夢，不過，好快，我就搵到當晚最大嘅娛樂！
當晚見到有班戴住傳譯機嘅人，笑到卡卡聲。好！就聽番中文，貪唔使用腦！唔聽由是可，一聽真係笑呵呵。個現場傳譯演譯時極度生動，聲線做哂抑揚頓挫。
當Jordon講：「WOW！」時，佢又一齊「WOW！」，當Jordan扮鴨叫時，佢扮得比Jordan更似！筆者仲聽到側邊有人話：「呢個人，不如去做動新聞，把聲夠賤，實好正！」
不過本人最欣賞佢嘅係，佢能夠將每一句，每一個意思，都譯得非常之咁精準，好似咁：
「大部份人問我，我可唔可以學得識，Sale嘢勁，我就話，『梗X係得啦！』」
「然後，我望住出面個玻璃門，出面有12條粉皮，呢12條X樣都係啲有錢人。」
你見到上面有兩個「X」，當然係唔出得街嘅字眼。於是本人本住八掛精神，去偷窺傳譯員，原來佢傳譯時手舞足蹈，極度投入，好似上咗身咁！望住佢，只諗到兩個字：「專業！」
事後千頌C捉咗佢做訪問，見到眼前呢位藍甄澤（Dennis）先生，連珠炮發講3粒鐘嘢後，完咗個Talk時氣羅氣喘咁，就知佢先前幾力，都係嗰句：「專業！」
Dennis就話，佢覺得好嘅翻譯，係要將講者神緒、語調傳遞俾受眾，「所以我唔會去刪剪任何粗口，其實我唔會去諗，因為真係自然反應，我會完全俾佢（Jordan）上咗我身。」
對千頌C來講，當晚聽佢翻譯開心好多。