在午飯飯局，成班中環男人無所不談，有時為佔中、反佔中呢類政治問題可以拗到面紅耳熱，不過大家在中環打滾多年，大家一致認為，即使「佔中」真的出現，對中環及金融界嘅騷擾，唔會大得過一場超強颱風，香港完全可以承受得起，反佔中者強調佔中會令香港受嚴重衝擊，係危言聳聽而已。之不過，人各有志，搞佔中嘅有我地嘅朋友，搞反佔中嘅亦有我地朋友，在電視畫面都見得到。人地鍾意點做咪點做囉，總有他（她）的個人原因，不必因此失感情，好似母乳餵哺咁，本屬個人自願行為，媽咪各有不同家庭、工作或個人原因，喜歡母乳餵哺便母乳餵哺，鍾意奶粉就用奶粉，正是你走陽關路，我走獨木橋，何解有甚麼團體組織係要禁止他人推廣奶粉的自由？只能講一句，莫名其妙。
我地講講吓，突然講到一夫一妻制，財務W話一夫一妻制源於基督教義，係百分百西方思想，中國傳統文化從來冇講過，古代男人自軒轅黃帝開始，皆視三妻四妾為正常制度，例如《蘋果日報》就講到江獻珠女士嘅江太史有十二位太太，直至最近八九十年，西方思維影響中國，中國社會才視一夫一妻為正規正當而已。不少西方道德觀念其實已深植於中國社會，但文匯報（七月二十一日）有一段中央組織部嘅「道德品行教育」報導如是云：「深入開展中華優秀傳統文化教育，引導幹部繼承和弘揚傳統美德，捍衛國家和民族的精神獨立性，防止成為西方道德價值的『應聲蟲』」。又講到《關於在幹部教育培訓中加強理想信念和道德品行教育的通知》要求各級幹部尤其要深入學習領會習近平總書記系列重要講話精神，「真正領會貫穿其中的馬克思主義立場觀點方法，堅定對馬克思主義的信仰，防止在西方憲政民主、『普世價值』、『公民社會』等言論的鼓噪下迷失方向，防止在封建迷信和宗教的影響下失去自我。」
將呢段「趣聞」講俾大家聽，曾經為投資銀行工作、駐北京幾年嘅賓架C為之失笑，佢話當年行經天安門，見過馬恩列史毛肖像不知多少次，毛澤東就信奉馬恩列史四個歐洲人，現在習近平要求幹部堅定信仰馬克思主義，其實係完全信仰西方人的價值觀。馬克思係猶太人，德國籍，在剝削資本主義國家英國嘅大英圖書館讀書寫書，信仰馬克思就是信仰西方思想，做西方人應聲蟲啦。如真的相信中華優秀傳統文化教育，啲落馬高官有三四個女人，有甚麼稀奇呀，何罪之有？我地在香港上學，自小聽老師講，禮義廉恥，國之四維，四維不張，國乃滅亡，現在舉國官員貪污不知廉恥，國將如何？