錢小豪在90年代尾開始在台灣及內地工作，到近年才回流及活躍於香港電影圈。對於近年香港的轉變，小豪甚感陌生，在中環長大的他近日為香港電台在中上環拍攝處境劇《同里有親》。舊地重遊，小豪雖可趁機緬懷過去，但結果他卻感到「桃花依舊，人面全非」。
撰文：文國駿
錢小豪對香港的轉變感到欷歔：「進步只係一個藉口，中環同香港梗係好，𠵱家咁繁榮，但係大家係咪一定開心呢？」在中環長大的小豪日前在將軍澳接受本報專訪時表示：「細個喺中環嗰時可以見到蔚藍天空，𠵱家就只能喺啲高樓大廈之間勉強見到一線天。」小豪認為香港雖然繁榮，但香港人不是真正的開心，他坦言：「時代要進步只係藉口，香港人其實可以深度啲諗一下，我哋點樣至係真正嘅開心。」
拍溫情小品冇難度
《同里有親》是小豪從影多年以來鮮有拍攝的輕鬆溫情小品，他說：「其實都幾吸引，劇情係講個花弗老竇想同個女修補關係。我見幾有趣又未試過，所以就即刻應承咗。雖然少拍呢類戲，但始終我都做咗30幾年，今次只係將我動作片以外嘅另一面發揮出來，仲有加埋我嘅人生經驗喇，所以絕對冇難度。」
《同》劇主要講述中上環一個小社區內的人與人，甚至人與地方的關係，小豪坦言感受至深：「我喺中環出世，以前有條街叫中國街，𠵱家連個街名都冇咗。文咸東街以前全部係大牌檔，由唐樓到𠵱家周圍都係高樓大廈，舊時望到個天變到𠵱家得番一線天，只可以講句『桃花依舊，人面全非』。」
雖然有人認為這個轉變是社會文明進步的必經階段，但小豪卻感到欷歔，他坦言：「進步只係一個藉口，中環同香港梗係好，𠵱家咁繁榮，但係大家係咪一定開心呢？我見佢哋食晏，幾廿蚊碗雲吞麵，只係逼住要食箒，個個望住個電話睇股票，好似好繁榮咁；但係坦白講，已經冇咗份感情喺度，個個係咁逼住嚟返工同放工，好似殭屍咁，一係就去蘭桂坊醉生夢死。我好感觸，繁榮抹煞咗一切，人與人之間冇溝通，除咗搵食之外就少咗關懷咁。」
感慨港人內心空虛
小豪認為香港是功利主義社會，那麼香港人應該怎樣平衡工作利益與生活？他謂：「你見到以前啲小朋友抽到珍貴閃卡時，會即刻拎去賣，係俾社會風氣潛移默化咗。𠵱家好多人嘅人生目標只係得一層樓，香港人外表快樂，其實內心空虛。」問到他有否向11歲大的細仔灌輸要平衡生活？小豪表示假日多與囝囝到郊外遊樂：「我想佢可以着住波衫同人字拖，自由自在咁出街，做番最舒服嘅自己。外國有啲小朋友，可能一個月得幾百蚊用，但係佢哋開心過我哋好多。」
【老友合拍】同孟海再起化學作用
錢小豪透露拍攝《同里有親》另一開心之處除可與有經驗演員如好友孟海合作外，還有年輕的監製及導演，他笑言：「我真係生得佢哋出。同佢哋一班年輕人合作，知佢哋想表達啲乜嘢，自己都年輕番，再同佢哋同步，令到大家有更多層次。」談到與多年老友孟海再次合作，他表示：「識咗佢廿幾年，佢第一次做導演已經搵我做男主角，後來我多數喺內地拍戲，所以就少咗接觸；好開心再同老友合作，以前嗰啲化學作用返晒嚟。」
