係人都知香港嘅前列騎師好搵,咁究竟有幾好搵呢?上季獎金收入最高嘅係韋達,曾策「事事為王」、「精彩日子」贏香港盃同香港一哩錦標兩場一級賽,全季所有座騎獎金1億634萬,韋達大概分到960萬,仲有57萬策騎費,即係總收入過千萬,仲未計馬主打賞,馬會又向外籍騎師提供宿舍、汽車同埋一家來回祖國嘅機票,咁你話係咪好過去搶先?
當然,只係少數騎師好似韋達咁好搵,好多人話一啲長年成績差嘅華將,點解唔退居幕後,講到佢哋生活好艱難咁,其實喺香港做騎師,就算成績差,收入都相當好。舉例湯智傑上季贏得六場,代表作係策「雲呢拿」後上險勝對手爆大冷W,全季佢自己嗰份獎金收入約60萬,策騎費就大概32萬,馬季十個月期間,平均月入超過9萬蚊。
仲有大家要知道,騎師除咗出賽,平時唔使點做,朝早五至八點幾操完馬,之後就自由自在,時間多的是,咁你明點解唔少華將都無意退居幕後啦!