動漫節首名入場的盧同學，由22號開始排隊，目標非常明確，就是搶買PS4。今日動漫節十點正式開幕，他第一時間衝到PlayStation攤位買心頭好，受各大傳媒追訪時，亦難掩興奮心情：「好興奮，自己一向是PS4 fans，今次送咁多贈品真係好抵，排三日都好值得！」他說贈品中最愛係個手提芒同耳筒，據官方透露，手提芒需要事前在網上登記先有，而盧同學雖然登記唔到，官方亦特別送一個給他，難怪咁開心！現場所見，PS4攤位人龍頗長，足足圍了整個攤位一圈，氣勢強勁！
Xbox One首位香港買家 買咗水貨再買行貨
相對於22號就排隊買PS4的盧同學，第一位買Xbox One的潘先生就「抵排」得多：「昨晚十點開始排，其實都係隊頭嗰班。」自稱是Xbox粉絲的他，原來早就以$5,900入手了水貨，但他說行貨始終有保養，更重要係「心理上開心啲」。至於成為第一位買Xbox One行貨的人，他直言自己都估唔到，而佢亦非常滿意今次的優惠價：「$3,380再送FIFA好抵玩，仲要有多一年保養。」雖然送禮堆頭不如PS4誇張，不過官方聲稱目標係所有買家，而非只是排頭位的買家，官方更期待今年會有上年多一倍的生意。
白兵大隊 現身撐HotToys
星戰白兵隊現身動漫節！原來係配合HotToys公佈取得迪士尼授權，推出星戰Episode 7及Episode 1-6的Figures製作版權而出現。現場有白兵之餘更有美女同Skywalker大派星戰紀念品！而HoyToys的攤位重點當然還有一系列新Figures預覧，最update的當然就有銀河守護隊的主角們，經典的就有回到未來的未來車，仲有變形金剛經典G1，當然唔少得鐵甲奇俠，除了有新的Mark III Construction Ver外，不得不看的還有放在Hall of Armor的全系列Ironman，勁有氣勢！
真人版巨人 進擊動漫節
動漫節的主舞台一向係唔少cosplayer的表演地，今年當然亦唔例外。今日（7月25日）上午更有參賽組別表演，其中最吸引的莫過於扮演進擊的巨人角色的一個組合，本身外形已夠神似，他們更自製了建築物、巨人等佈景配合，即場上演一幕真人版進擊的巨人！到尾聲更有變身成巨人的主角艾倫登場，雖然身形唔似，更有點膠味，但創意加誠意搭救，吸引勁多人圍觀及掌聲。而其他參賽者水準亦相當高，cosplay比賽結果將於下星期二公佈。
一人一票 選出「趣味香港」
雖然特首普選方法未定案（又或者阿爺已經定咗？），不過大家如果去動漫節亦不妨可以去Lego攤位，投選下你最愛的「趣味香港」Lego大師作品，今次入圍的共有14個作品，有戲棚、中環天橋、蘭桂坊、公共屋邨、郵輪碼頭等等，新舊香港特色都有，件件都非常精巧美觀，每個進入攤位的參觀者都會有一張選票，投選最愛，講真真係幾難揀，因為每件都好靚！選舉以外，攤位亦有以「極地探秘」展覽，砌出多款極地動物；又有日本Lego達人親臨；亦有不少精品及Lego出售，Fans要去。
《創造球會》現人龍 達哥被人圍
今年動漫節，手機遊戲聲勢頗浩大，其中《創造球會》人氣盛大，有唔少人排隊，附近亦聽到唔少人問：「龍尾喺邊？」。粉絲們買精品，當然更重要係要球星卡，當中唔少更係相對較年長的玩家。
這邊廂《創造球會》吸較成熟玩家，另一邊廂的《The Legend Of Heroes XIII》就有網絡紅人達哥現身，吸引一班年輕玩家。大多是初中生的小朋友，瘋狂擁著達哥爭合照，而且越影越多人排，可見達哥的超高人氣，現場他更大派其個人特別卡。其攤位亦展示了遊戲比賽的獎品Mini Cooper，可惜都係唔夠達哥吸引。
【動漫 Live 不停】 一連5天好玩到癲
http://hk.apple.nextmedia.com/livestream/channel/dvlive
http://bit.ly/ucg2014Live