《蘋果》馬經動主播Paris陳穎，喺新西蘭探望過兩匹退役名駒「時尚風采」及2012年香港打吡冠軍「陽明飛飛」後，又同大家探望正喺當地告達理兒子馬房享受退休生活嘅「高風格」。
「高風格」可以話係一代忠心鐵馬，就快九歲嘅佢，其實唔算好老，但戰績就好輝煌，服役時出賽43次，攞到9冠2亞5季，田草、泥地及谷草都贏過，累積獎金707萬，雖然未達到級際賽水平，但由於勝出及上名率高，幫過唔少馬迷贏錢，喺大家心目中，係一匹好可靠同可愛嘅馬。
家陣「高風格」唔使再出賽，喺廣大嘅牧場上無拘無束地食草，你睇佢咁自由自在，生活都不知幾優悠！
Paris概嘆香港環境擠逼，無論人馬想要多啲空間都唔容易，佢話好羨慕「高風格」，可以喺咁好嘅環境生活，搞到Paris都心郁郁，希望將來可以同另一半，喺新西蘭享受人生喎！