政壇元秋蔣麗芸舉止粗枝大葉，辯論技巧又流於捉字蝨嘅水平，但睇唔出佢數口精過乜！最近有人向八方提供立法會嘅開支申報單據，話元秋平時原來會幫佢啲助理嘅電話費開公數；近排更疑似用同一張單開兩次公數。
是咁的，元秋舊年11月同12月為辦事處使費申報公數嘅檔案裏面，同時出現咗一張電話公司喺12月發出嘅單，而佢用咗呢張單，前後共領番420蚊。有得拗嘅地方係，佢第一次就係想申領11月嘅電話費，第二次就應該係領12月電話費。之但係元秋舊年10月開公數嘅檔案內，都有一張11月嘅電話費單，同樣又領番200蚊。到底係無心之失抑或真係想賺到盡？八方唔敢亂猜，只知秘書處若發現重複申領，一般都會剔除，唔會枉花納稅人啲錢㗎。