中國「巨人」姚明退役3年，澳門嘅「小姚明」就正值當打。綽號「姚明」嘅過江龍黎家棟噚日出戰Nike League，唔單止幫球隊Warrior大炒對手殺入4強，尾段仲借助1米93嘅身高入樽贈興，搶盡風頭。
Nike League噚日喺麥花臣球場上演多場8強戲碼，其中U19球隊Warrior除咗以82:43大炒Buster，尾段仲有18歲小將黎家棟表演入樽，令全場為之瘋狂。呢位功臣來自澳門，爸爸係香港人，所以有香港身份證報名參賽，佢喺訪問時話噚日（前日）現場睇住勒邦占士入樽，搞到自己都心思思想喺同一位置試身手。
譚偉洋都話勁
「姚明」仲話，自己有留意甲一球隊南華，有機會都想來港發展。至於南華老大哥譚偉洋（小圖）噚日都有觀戰，賽後都有大讚佢彈跳力驚人。不過，「姚明」𠵱家仲讀緊澳門大學，就算想打甲一，都要等畢業先啦！Warrior會喺今日下晝5點對戰Hunter爭入決賽，而Frigate就會同Cannon合演另一場4強戰。
