美國企業進入業績高峯期，兩大科企藍籌蘋果和facebook都交到貨，後者表現尤佳，喺流動廣告高速增長帶動下，盈利翻逾倍，股價創新高，而投資者對秋季登場嘅iPhone 6寄予厚望，加上強國市場潛力佳，蘋果股價走勢亦唔執輸，如無意外應該好快破百，改寫兩年前嘅歷史新高。
事實上，儘管世界近來處多事之秋，烏克蘭內亂導致馬航客機被擊落慘劇，中東嗰邊以色列繼續攻擊加薩地帶，話口未完，前日又輪到台灣發生墜機造成數十人蒙難。但美股硬係鍾意同淡友作對，近期續創新高，甚至連中港股市係阿爺放水效應下亦生猛翻晒，令好友精神為之一振。
聯儲局主席耶倫早前出席完國會聽證會，雖然話過如果就業市場續有驚喜，美國加息期可能提早重臨，但市場普遍認為佢傾向拖得就拖嘅立場，其實無變過。雖然話咁快聯儲局下周又議息，十之八九會再縮減買債100億美元，但今次會後冇記者會，會後聲明亦應該唔會喺金融市場引起漣漪，9月嗰次會議先至會有料到。
但唔知係咪近排壞消息多，加上各地數據參差，美元本周走勢強番啲，美滙指數昨逼近81，歐元曾跌至八個月低位，英鎊則喺1.7美元關口爭持，強勢貨幣紐元昨更錄得頗大跌幅。而英國自從英倫銀行行長卡尼早前自爆話之前放風提早加息，純粹想操控市場預期後，英鎊有點似強弩之末，而禮拜三公佈嘅議息紀錄亦冇乜點提加息，加上昨日出爐嘅6月零售數據，撇除燃料項目按月僅升0.1%，比市場預期低一截，昨日執筆時英鎊曾跌到落1.7美元邊緣，中線前景看俏格局雖未變，但短期形勢處下風，1.7算可能會穿。
日圓命運秋後見真章
今年一直強勢嘅歐元，上周開始走勢轉差，不過，歐洲數據近排唔算差，相信近期弱勢係技術走勢轉差有關，昨日曾跌至1.3439美元，創八個月低位，幸好之後公佈的歐元區PMI指數，刺激歐元由低位回升。
本周滙市焦點，落在紐元身上，雖然新西蘭央行昨日一如預期加息0.25厘，令官方利率加至3.5厘，但連開四鋪大之後，央行行長暗示短期放軟手腳之餘，重提紐元滙價高得滯，紐元昨日低見85.68美仙，跌幅達1.3%，係九個月最甘。但央行行長早前暗示年底前加息至4.25厘，照計年底前仲有得加，調整幅度應該大限。美國10年期國債孳息本周亦低於2.5厘，美元兌日圓跌唔落，解釋係大家都覺得美債孳息再下跌空間有限，但因日圓走勢對美國孳息升跌較敏感，有理由相信秋天後，日圓會有明確方向。
奇兵
本欄逢周五刊登