永隆全線分行下周一就換新制服，希望一改沉悶形象。咁舊制服點處置呢?永隆助理總經理兼零售銀行部主管鍾少權（Derek）就話會捐去綠長青環保協進會，等有需要嘅人接收呢批衫。
話時話，Derek由星展過檔永隆，轉眼15個月，佢不停為銀行軟、硬件進行改革，單係分行面貌，仲要多三年先完成。
而最近一項革新，就係即將喺年內推出嘅保安編碼器，保安編碼器產生一次性保安編碼，為核實個人電子銀行嘅指定交易提供雙重認證。有別於第一代橢圓形、第二代好似小型計數機嘅保安編碼器，永隆即將推出嘅係薄到好似信用卡咁嘅保安編碼器。Derek認為，男士一定會覺得好方便，因為終於可以放入銀包。