經常抹黑民主派爭取民主係「搞港獨」嘅民主建港聯盟，日前喺主席譚耀宗帶領，出訪美國三藩市時，就一邊尋求早與「外國勢力」水乳交融嘅僑領簽名「反佔中」，一邊喺幅寫有「香港民主建國聯盟」嘅巨型橫額下開記招。誰是港獨政黨，勢估唔到喺今次訪美之行「現真身」。
空運反佔中表格谷簽名
三藩市當地一間電視台採訪民記記招，再將片段放上網後，民記醜態喺facebook同網上論壇瘋傳，網民恥笑民記喺美國話要「建國」，名副其實係「搞港獨」同要「香港獨立」，立場仲激過經常喺網上打字，話要建立「香港城邦」嘅陳雲。
從當地電視台片段顯示，民記喺記招後段似乎深明「瀨嘢」，不惜即場示範如何「遮醜」，將「香港民主建國聯盟」嘅「主」、「國」、「盟」三字，好似人地做法事咁，用三幅黃紙遮咗佢，令幅banner變返「香港民建聯」。
其實民記此行為交數反佔中，不惜空運咗大批「保普選反佔中大聯盟」表格到美國，再派發畀當地僑領簽名，擺到明係邀請外國勢力干預香港事務，難怪有當地僑領對民記此舉十分反感。
其中台山寧陽會館商董甄樹燦，接受當地傳媒訪問時，就公開表明「唔認同」民記來美國搵僑領簽名反佔中，指「因為呢啲（反佔中）係香港的事」。
根據行程安排，民建聯嚟緊仲會到訪當地唔少僑團嘅代表；而聽聞立法會主席曾鈺成咁啱又喺美國，會向當地智庫取經，唔知屆時會否分頭商討「建國」大業？
李八方
mailto:[email protected]