為咗4億日圓（約3,100萬港元），你可以去到幾盡？葡萄牙國家隊隊長基斯坦奴朗拿度（C朗）雖則係現今球壇最top球星，但去到日本宣傳，都要放低球王身份，喺電視示範代言嘅神奇瘦面棒（簡稱PAO）。
現效皇家馬德里嘅C朗，喺今夏巴西世盃失敗收場，佢喺歸隊備戰新球季前去咗亞洲搵銀。日前呢位29歲靚仔球星獲邀到日本，為由佢代言嘅健康美容公司MTG做宣傳，亦去咗富士電視台上SMAP嘅節目，頭尾只去兩日一夜，但據聞有4億日圓落袋。
咪以為好易賺，佢其中一個行程係上電視節目，一開始個男主持就搬張C朗騷肌肉海報出嚟，仲不斷用手指篤佢身上兩塊「雞扒」同8嚿「朱古力」，搞到佢有啲尷尬；好彩C朗跑慣江湖，笑一笑就當冇事發生過。
吸金力媲美萬人迷
戲肉之後嚟嘞，C朗要示範由佢代言嘅神奇瘦面棒，而佢都好合作，作狀咬住；然後佢將支棒畀咗個男主持，點知對方咬住支棒係咁上下搖個頭，非常滑稽，搞到C朗震驚到天然呆。話時話，查實佢係呢支棒嘅代言人，應該好清楚支棒點玩吖，點解會咁驚訝呢？或者係男主持玩得太投入，C朗先整個咁嘅表情。示範完支瘦面棒，之後C朗仲親自教大家點用個鈦金屬按摩器，喺個熟女主持塊面度碌嚟碌去，搞到個熟女鬼死咁enjoy。
C朗今次真係賺到笑，搵錢能力拍得住萬人迷碧咸；事關碧咸2003年夏天去亞洲一個星期，勁賺17.3億日圓，2004年同老婆維多莉亞幫日本美容院TBC拍廣告，又袋走3.25億日圓。講真，C朗靚仔又親民，唔怪得喺亞洲咁受歡迎啦！