NBA球星林書豪由火箭轉會湖人，有人歡喜有人愁，最開心嘅當然係佢嘅粉絲，失望嘅可能係中興通訊（763）。話說中興舊年10月先同火箭簽四年贊助合約，講到明睇中呢隊前有姚明、後有「林瘋」嘅籃球隊，吼實中國、台灣兩岸球迷嘅市場。
點知贊助唔夠一年，林書豪就宣佈轉會，打亂晒中興嘅宣傳大計。不過，中興副總裁張樹民噚日就死撐話，其實火箭仲有好多球星，仲有好多華人粉絲，唔擔心中興手機用家齊齊跟住轉會喎。
講番中興，公司今年上半年手機出貨量有2,800萬部，執行副總裁曾學忠放風話，稍後會公佈推出智能手環，不過佢就唔肯透露智能手環嘅價錢，唔知係咪又亂咗部署，俾小米定價79元人仔嘅智能手環嚇親呢？