750萬上季最貴拍賣馬「金珀龍華」嘅馬主謝國輝，好多人都知道佢係深圳龍華鎮首富，身家以百億計，涉足房地產等多瓣生意，但估唔到佢最近連娛樂事業都搞埋，出錢拍電影，由老婆金沛橋做製片人，本周三仲喺龍華鎮舉行開鏡儀式，現場有成幾百人，聲勢浩大，由謝國輝等人一齊上香切金豬，祈求拍攝順利。
套戲個名叫《黃金福將》，係一齣勵志喜劇，大家熟悉嘅朱咪咪同KK張國強都有份參演。至於男、女主角，分別係韓國型男李承炫同拍過成龍《十二生肖》嘅內地1米77長腿索女張藍心。最特別係謝國輝嘅千金謝金鈺殷，都做埋一份，飾演李承炫個妹。
謝國輝話自己係電影界初哥，但就對幕前幕後班底好有信心，李承炫嘅角色係一個富二代，因為狂妄吃好多苦，好似現實版《王子變青蛙》；而謝老闆又話雖然投入唔少資金拍戲，但唔會減少對賽馬嘅投資，照樣會買好多貴馬、靚馬來港上陣。