一個人EQ再高，都難以接受刻薄批評。在批評聲音中長大的鄭欣宜，坦言曾想過退出娛圈，如今簽約拍電影，不求名成利就，只為求贏取觀眾的尊重，但我們可曾給過她機會？今集《亂噏24》繼續由欣宜擔任嘉賓，讀者可在 http://bit.ly/appletalk24重溫節目。
撰文：馮國康
肥胖的人通常予人論盡感覺，鄭欣宜卻比普通人靈活，擒高擒低、一字馬均難不倒她，如最近她在電影《辣警霸王花》扮演女飛虎，動作戲份應付自如，欣宜搞笑說：「乜嘢動作都要做，唯一冇做就係着三點式！趕客就費事啦！」她認為肥瘦根本無關重要，最重要是有沒有決心做好：「我反而係畏高，係自己一個心理難關。」
爆肥姐一火就打
欣宜今次簽約拍戲，有不少網民對她冷嘲熱諷，稱沒有人想看她演戲，勸她繼續唱歌。柳俊江戥她不值：「微博唔好玩啦，個個憤青嚟！擺乜落去都刪嘅，咁不如唔好玩！」陳淑莊（Tanya）認為看那些惡毒批評只會打擊自信，欣宜卻不認同：「我都係人，可能有日EQ低啲，會覺得好痛。但我覺得都要睇留言，因為好友會有bias，會偏幫你，但你要知道邊啲做得好同唔好，就要靠睇留言。」她擔心自己生於演藝家族，或會被過份保護而不知進退。
柳俊江坦言在接觸欣宜之前，也先入為主地誤以為她是活在庇蔭的女孩，今日一見另眼相看。欣宜歸功於母親沈殿霞的嚴厲管教：「佢真係會打，我細個好曳，明明嗰頭食完飯，轉過頭又想食麵包，媽咪真係會火滾一巴車埋嚟！當然，唔係乜嘢都打。」
從沒有惱恨秋官
Tanya問欣宜平日遇到困難，可會請教父親鄭少秋？欣宜答：「因為我八個月大，爹哋媽咪已經分開咗，所以其實我一路以嚟都冇同爹哋相處，好少見面，係近幾年先見得多咗。」柳俊江問她可會恨對方，欣宜肯定的說：「唔會，我唔識得恨人，同埋我記性好曳。」柳俊江反應快：「咁又係，肥佬黎（黎智英）你都係藐吓算！」
自小父母離異，又與外婆同住，間接令欣宜在成長階段比同齡小孩「老積」得多，她說：「可能係冇嘢做，成日喺度諗嘢。」同樣是單親家庭長大的Tanya，認為越早知道父母離異的真相，思想便會越開通，欣宜相當認同，她自有記憶便清楚這是甚麼一回事。在非一般的背景長大，練就了她的豁達幽默個性，6歲時更這樣自我介紹，「Hi, my name is Joyce. My mum and dad are divorced.」令她的老師也不知所措。
欣宜覺得媽咪在處理感情問題相當大方，多年來從未在她面前說過秋官和他的家人半句壞話，她說：「佢反而成日叫我搵爹哋，成日話畀我聽，冇爹哋就冇你，無論點都好，要孝順爹哋。同埋我媽咪會叫埋兩個妹一齊食飯。」也因為媽咪在感情上夠開通，欣宜也領悟到感情事不能強求，就算努力付出，也並非百分百成功，她又「補飛」說：「但同時間我都相信一段愛情入面，如果雙方都肯work for it，同埋有trust、有愛、有尊重同communication，係一定work㗎！」Tanya打蛇隨棍上：「咁即係work唔work啫𠵱家？」欣宜淡然說：「我𠵱家好開心，有好多好錫我嘅人。」
自認八卦的Tanya追問欣宜的感情事：「會唔會身邊已經有集齊晒所有以上元素（信任、尊重、愛）嘅人喺身邊？」欣宜爽快的答：「有，睇《忽然一周》啦！不過有好多嘢我都唔知，我都係睇番『哦係咩？』」欣宜自問已經沒有任何秘密，拍拖也沒必要隱瞞。
跟男友本是教友
欣宜自爆與男友（Silas）的相識經過：「我識呢個人好耐，我哋喺教會識。」柳俊江問：「會唔會係真命天子？」欣宜嚴肅的說：「唔知，今日唔知聽日事。但我每一次拍拖都希望會長久，唔會沙沙滾。」欣宜分享完，柳俊江轉問Tanya的情事，不過Tanya例牌以「普選」做擋箭牌，她自嘲說：「人年紀越大，個market越闊，我都覺得好掂！」
無疑，27歲的欣宜人生經歷比其他女子來得豐富，Tanya覺得欣宜到了30歲之後，可塑性會更大，工作機會也更多。提到有何人生目標，欣宜嘆一口氣說：「唉，唔應該咁樣講，我好唔認同要將自己目標set喺人哋點樣睇我，但我好想得到大家尊重我係一個藝人。」柳俊江再三強調欣宜只欠一個機會，又覺得其父母影響力已逐漸減少，後生一輩未必看過他們的演出。
靠自己捧餐何妨
席間，柳俊江提出一個有趣問題，假如欣宜沒有加入娛樂圈，她會從事甚麼行業？欣宜答：「其實我舊年都諗過唔做藝人，因為我性格問題，成日覺得肥瘦唔重要。咁我諗過轉做幕後，轉做management或production角色，其實我捧餐都唔介意，只要係自食其力，唔會理會人哋目光。」柳俊江認為欣宜適合做生意，因為覺得她舉手投足都甚有霸氣！Tanya提議欣宜擔當一些顛覆傳統、挑戰權威的角色，欣宜自愧不如，並謙稱還有很多學習地方，她說：「你要我企出嚟教人哋點樣呀，乜嘢人生教練呀，唔得囉！我希望唔好再話係乜瘦身神話，因為我覺得我會繼續做錯嘢，一定會再令你哋失望，所以唔想擔當呢啲角色。」
感激張玉珊
欣宜在節目上不忘感激張玉珊，是對方教曉了自己很多生活常識，令她終身受用：「我識佢嗰陣係青春期，由我唔識得要用洗面奶洗面，到𠵱家識得敷mask、修眉、扮靚化妝，都係因為佢。」
不過令欣宜最深刻的，是當年母親過身，張玉珊第一時間打電話來問候她，她說：「佢係冇必要打電話畀我，又問我需唔需要錢。我又唔係你啲乜嘢親人，又唔係欠我啲乜嘢，你肯去咁樣offer，我好感動。永遠都會記得。」
欣宜要報仇︰「點解蘋果寫衰我！」
http://bit.ly/talk245401
肥人大忌之首 最怕着三點式？
http://bit.ly/talk245402
肥姐教女有一手 兜巴車唔留手！
http://bit.ly/talk245403
微博fb多憤青 網民轉場了？
http://bit.ly/talk245404
肥姐要欣宜孝順秋官「佢要我搵爹哋」
http://bit.ly/talk245405
「daddy喺邊度？」單親越早知越好
http://bit.ly/talk245406
欣宜status拍緊拖 有位男士好識貨！
http://bit.ly/talk245407
30歲係轉捩點 夠資歷先有機
http://bit.ly/talk245408
半島high tea唔吸引 大排檔先有氣氛
http://bit.ly/talk245409
欣宜感激一個人︰「佢令我做返正常人」
http://bit.ly/talk245410