從前有個股壇猛人，你同人提起佢個名，好多人都會話：「呢個人好勁㗎喎！炒股炒到出神入化。」但佢為人低調，Google都搵唔到好多資料。如果有一日呢個全世界都知道佢低調嘅猛人，突然走去買一個極具國際地位嘅品牌，而品牌更會由本業延伸至其他業務，包括地產發展。咁啱你發現呢位仁兄於公佈消息前幾個月突然入股一間公司，市值仲要只係殼價4億元左右！最後呢隻股仔賣殼，然後猛人注入國際品牌業務，發光發亮。
呢個故事係咪齋聽已經聞到炒味呢？上周香港股壇猛人任德章，與華碩創辦人謝偉琦共同成立嘅本匯鯨收購《福布斯》，據報涉資37億銀。大家咪以為《福布斯》只係做排行榜，根據新聞稿《福布斯》本身已有與本匯鯨於金融同地產方面合作。講真拎住呢個國際級品牌要搵合作、集資，相信都易好多吧！所以有理由相信，未來呢兩方面業務，估計有多冇少。
再上披露易望一望，任德章除持有豐臨（1152）等公司外，於4月初由原本對北亞資源（061）零持股突增持至6%。北亞資源最新市值只係4億元左右，近幾年業績蝕到趴喺度，至於NAV仲要係負數（即係負資產），唔係等賣盤真係唔知為乜？再諗返上面個故事，唔知任德章呢兩個舉動，到底有冇關係呢？
Fifi
http://www.facebook.com/lovefrystock
本欄逢周二、四刊出