常說要維繫一段婚姻並不容易，名模周汶錡（Kathy)與法國籍丈夫Julien Lepeu結婚後，當了人妻的Kathy事事以家庭為重，婚後兩年仍處於蜜月期，訪問時當談到丈夫Julien，不時露出甜蜜笑容，完全感受到那種發自內心的幸福感，或許法國男人特別浪漫吧！經過兩年的磨合，Kathy學會了夫妻彼此要尊重與包容，至於造人大計，Kathy就交給上天安排。
統籌：林妙萍
採訪及造型：顏英儀
攝影：周樂恒
化妝：Omix B
髮型：Debby Kwan of Hair
名模周汶錡（Kathy）與丈夫Julien結婚兩年，Kathy直言婚後比以前更開心滿足，還記得前年9月Kathy於法國南部舉行婚禮時，收下了不少金豬，談到造人大計，Kathy說：「努力緊，呢啲都係等天安排，唔知幾時會發生，加油喇！不過老公講笑話將來有了小朋友，我就同仔女一齊學法文。」
婚姻要包容
眨眼間Kathy與丈夫結婚將近兩年，Kathy甜笑說：「時間過得好快，咁快就嚟兩年，都會慶祝吓，結婚之後比以前開心咗，兩個人一齊計劃將來，相處嘅時間多咗，都會有磨擦，有時冇話邊個啱邊個錯，最重要唔好改變對方，兩個人最緊要畀空間大家，結婚最重要係要互相尊重同包容，我以後嘅人生每一日都在學習。」
放屁小情趣
婚後Kathy與丈夫日對夜對，生活細節也坦蕩蕩，Kathy笑言就算丈夫在他面前挖鼻、放屁等也是令她開心的生活細節，「一齊生活就要接受呢啲習慣，做番自己，我老公最鍾意喺屋企人面前做呢啲小動作，呢啲係生活情趣，都係開心事，做人最緊要有幽默感。」
做了模特兒十多年的Kathy近幾年已絕迹T台，只會間中出席品牌活動做嘉賓，當紅時期Kathy每日出幾場騷，幫雜誌影相，密密搵錢，現已進入收成期，對工作的熱情漸減，「結婚後一定係家庭為先，以前後生不斷工作為咗賺錢，𠵱家就進入享受階段，我從來冇刻意計劃人生，亦冇諗過會同外國人結婚，一切來得順其自然，唯一會為旅行行程計劃，plan吓去邊度玩，邊間餐廳好食，法國人每逢7、８月都要放暑假，下個月我哋就會去法國南部嘅Villa度假，我同Julien都鍾意旅行，呢方面我哋好啱key。」
模界美魔女
近年美魔女當道，很多廿來歲的後生女都自愧不如，Kathy剛踏入40歲，並沒有恐懼踏入4字頭，而且還越來越靚，堪稱模界美魔女，「40歲只係一個數字，心態同諗法最重要，有啲人怕老咗皮膚開始有皺紋，用唔天然嘅方法令自己更青春，但其實有時太完美未必係好事，有啲皺紋都幾靚，老係自然定律，每個年紀都有唔同嘅靚，我後生包包面覺得自己好醜，𠵱家睇番覺得幾cute！」Kathy自言保養工夫做到足，「我好勤力keep弗，定期做facial，去旅行時大魚大肉，之後就食清淡啲，畀身體排吓毒，瑜伽同拉筋係我唯一會做嘅運動，可以令皮膚更firm。」
更多精采時尚內容，盡在 http://add.appledaily.com。