全球最大肉製品生產商萬洲國際（288），4月招股慘遭滑鐵盧。該次IPO曾惹來投資界惡評如潮，如定價過高，但又同時擘闊招股區間，令人覺得公司「博大霧」。而萬洲上市前，曾向管理層派發巨額花紅，導致業績虧損；私募基金股東又想趁機賣舊股套現；仲未計那29間看似好陣容鼎盛、但實質互搶生意、搞亂檔的承銷團。種種不利因素夾擊，萬洲最後上唔到市，屬情理之中。
今次萬洲捲土重來，Deal structure變正路得多。預測市盈率落返去約11.2倍正常水平，無晒舊股，集資規模縮小，承銷商由29間cut剩兩間，充分體現「簡單就是美」。
港股近日破頂，論市場氣氛可謂相當配合。而萬洲今次以「一口價」進行招股，反映公司頗有信心，相信已和一些機構投資者取得默契，鎖定部份認購。如此看來，單deal要過關，問題不大。如果海迪係萬洲股東，會覺得自己執番身彩。
咁海迪會否認購萬洲？答案都係no。可能你覺得中國人鍾意食豬肉，所以有前景；又或者認為萬洲估值有水位。
但海迪更看重，是管理層質素：如果班人你信唔過，講乜都無用。順帶一提，萬洲早前公佈首季業績，表現一般，現時券商進行估值，並沒有顯著調整今年盈利預測。投資者認購時應當留意。
海迪