邊個話政府唔派錢，每年一度嘅通脹掛鈎票據（iBond），擺明就係還富於民嘅工具。回報同通脹掛鈎，意味三至四厘冇走雞，加上政府包底保證有一厘回報，名符其實零風險投資。睇番對上一批iBond，共有52萬份申請，當中有49萬份認購多過一手，由於採取循環分配機制，最後每人最多只分得兩手。
夥搜房拓網上金融
唔好睇少呢兩手，假設一家四口出擊，中足八手，每年嘅回報都有3,200蚊，用嚟交吓差餉都幾好，作為納稅人，千祁唔好蝕畀呢個無能政府。
港股再度發威，執筆之時夜期已升穿二萬四，大市成交連續兩日超過700億銀，動真格也！再有城市撤銷限購令消息，內房股一湧而上，今日推介嘅合富輝煌（733），仲有驚喜三重奏。
驚喜一︰業務突破。公司月初宣佈，獲紐交所上市同業搜房入股約15%，董事長扶偉聰表示，會與新股東攜手進運互聯網金融，地產代理特點係現金流夠強，所以搞網上金融可謂絕配，有力做到1+1 =3嘅效果。
驚喜二︰估值超平。合富現價市盈率5.9倍，比起搜房嘅14.6倍，平足60%！市賬率僅0.8倍，又比香港同業美聯（1200）嘅2.3倍，折讓65%，點秤都係大落後。
驚喜三︰走勢可人。搜房入股消息曝光後合富一度炒至3.48元，經過一輪整固後，噚日有破旗迹象。再講，搜房入股價3元，現價2.63元入場，已經贏在起跑線！
唐牛
https://www.facebook.com/tongcow88