每個馬季都有多捷馬出現，上季就有「神舟十號」、「迎風飄揚」同「駿馬名駒」等各自五捷，其中「神舟十號」公認有潛力成為新一代短途霸主，練馬師徐雨石仲講明，今季10月1號國慶盃由1400改為1000米，更加係「神舟十號」嘅大喜訊㖭！
好嘞，講完多捷馬，咁現役馬之中，邊隻最黑仔呢？馬會前主席陳祖澤名下嘅「好事必得」都可算表表者，至今跑過7次第二而未勝，係現役亞軍次數最多嘅處女馬。佢究竟點黑法？原來成日存心出擊時，每每遇上大超班對手而僅敗，好似「小母牛」、「川河首駒」、「輕彈錢笑」、「勝飛」同「智者」等，跑贏「好事必得」之後，都可以喺三班甚至二班贏馬，試問四班馬「好事必得」對住佢哋點會夠跑呢？好在呢匹陳祖澤愛駒新一季六歲唔算老，評分亦非太高，相信仍有機會打破二奶宿命。
除咗「好事必得」之外，徐廐「宇宙駿駒」同呂廐「晨采」，都曾六次跑入亞軍而未勝，亦可算典型黑仔馬。