上星期同大家點咗題嘅巨濤海洋石油（3303）， 經歷咗「藏運化生收」之後，又再開始向下一站進發！試吓放長線捉靚魚，繼續追蹤，鏡頭一轉，再講吓啲新股。
新股近排好似冇之前咁熱烈，但係Prof J留意到一隻股票，呢隻股雖然只係準備招股，不過，相信大多數投資者都聽過。
呢隻股早前擱置上市，今個星期決定再衝關，並且以較細規模出手，大家知唔知係邊隻呢？就係萬洲國際（288）。
業務日趨多元化
咁多間公司，點解萬洲國際可以成為行內嘅大佬呢？梗係有佢特別嘅原因，萬洲國際主力銷售豬肉食品，主要業務包括處理生豬養殖、豬肉處理、肉製品等。
萬洲國際嘅業務概念獨特，品質良好，再加上有良好嘅客戶基礎同優越嘅口碑，相比其他同行，公司有一定優勢，無論喺中國、美國，抑或歐洲都係領導者。過去一年，萬洲國際以大衆為主要消費對象，更與史密斯菲爾德（美國一間肉製品公司）合作，開拓萬洲國際喺中國同埋外國嘅零售業務，同時喺河南開設史密斯菲爾德精選冷鮮肉嘅專櫃，主要銷售冷鮮肉，並且受當地消費者熱烈愛戴。
直到而家，專櫃數目已經有十多個，係唔係好利害！嚟緊一年，萬洲國際將會開拓埋一線嘅城市，例如鄭州、西安、瀋陽、上海等地，喺唔同嘅省份建立肉製廠，推銷美式低溫產品，令產品業務變得更多元化。
睇埋萬洲國際嘅盈利，萬洲國際嘅財務年度業績保持高速增長，加上去年同史密斯菲爾德產生協同效應，銷售量比預期數量有增加。
上一季度，萬洲國際喺中國嘅業務增長達7.1%，而喺美國嘅業務淨利潤增長高達93%。
未來一年，史密斯菲爾德與萬洲國際嘅發展將會越嚟越成熟，預計萬洲國際嘅利潤會繼續增加，小注追蹤，出發！
徐燦傑
齊魯國際控股首席策略總監
本欄逢周四刊出