前行政會議成員「梁粉」張震遠，喺佢做主席嘅商交所爆煲之後，被揭債務纏身，甚至因為旗下新效控股、商交所股東公司拖欠新利控股非執行董事梁志漢4,000萬元貸款，俾梁喺今年2月申請破產。單案經過三次押後、一拖5個月之後，噚日終於有新發展。代表梁嘅律師喺高院話，雙方喺本周一終於開始傾和談，一致同意將案再押後兩星期喎。
張震遠係喺舊年1、2月向梁借錢嘅，計埋利息，梁追收嘅錢就高達4,733萬元。張震遠會唔會破產？下個月6號會有分曉，但佢嘅律師就喺庭外透露，張震遠喺呢幾個月內還過300萬畀梁㗎，但佢哋點傾就不得而知嘞。