「山雞，呢排撈成點啊？」
「南哥，總算做咗揸fit人。」
「恭喜晒喎，屯門定元朗？」
「係惠州。」
「惠州？你話惠康啊嘛？你學人睇超級市場？」
「惠州，廣東省惠州。」
「廣東省？我地洪興幾時返咗大陸發展？我無聽蔣生提過嘅？」
「蔣生已經out㗎啦，我大佬姓習，其他我唔方便講。」
「惠州揸fit人，都幾好聽啊。」
「你可以叫我惠州政協。」
「山雞，古惑仔，點解要做官呢？」
「黑社會也有愛國的。」
「山雞，你係咪響微博度，話屋企喺香港已經300年啊？」
「咁又點啊？」
「你係咪話，要搞破壞嘅人，請離開香港啊？」
「咁又點啊？」
「山雞！你係咪short咗啊？我地嗰陣喺球場，都係一路打一路爆可樂樽，衝出屋村，衝到銅鑼灣！我地嗰陣算唔算搞破壞啊？你係咪要趕我離開香港啊？」
「南哥你冷靜啲，我係講佔中嗰啲人啊？」
「佔中有咩問題？我地當年都佔銅，佔領銅鑼灣啊！唔係點做做揸fit人啊！」
「南哥你打橫嚟講，佔銅點同佔中呢？」
「嗰時東星仔用污糟手段，害死蔣生仲要屈我出賣社團，同依家啲人爆黑材料話咩捐款話咩外國國籍，有咩分別？東星仔踩場，我地反抗，你話邊個係暴力？邊個係反暴力啊？」
「南哥，佔中會癱瘓中環㗎……」
「山雞！當年第三集，牧師喺屋村拖馬，成條村都癱瘓咗㗎，但街坊知道我地係對付壞人東星烏鴉，不知幾咁支持！人多人少唔係問題，最重要，係咪企喺正義嗰邊啊？」
「南哥，人在江湖，身不由己。」
「你仲記唔記得第三集首歌點唱？」
「~要有這樣氣候，至有各樣妖獸，笑說正義太陳舊。正氣縱是太舊，天地未能沒有，不管有什麼藉口~」