「各位觀眾，同花順！」「真係冤家牌，我都係同花順，不過個花大你啲啲！」呢啲港產賭片嘅經典「話事啤」橋段，睇嚟今季西甲國家打吡戰都會上演。當然唔係講班球員落場賭啤，而係占士洛迪古斯周二正式加盟皇家馬德里，同基斯坦奴朗拿度（C朗）、卻奧斯、賓施馬、加里夫巴利（巴利）組成嘅7、8、9、10、11同花順，巴塞有蘇亞雷斯加盟，同樣組成呢條同花順，真係唔知邊個勁啲。
占士現身大賣口乖
世界盃一舉成名嘅哥倫比亞中場占士，周二完成體測後，就現身巴拿比奴球場，全場有近5萬球迷歡迎呢個新10號，仲有狂迷衝入球場同佢擁抱㖭，不過好快就俾保安撳低。身為世界盃神射手、23歲嘅占士都好識賣口乖，記者會上講：「皇馬係我一直最喜歡嘅球會，能夠加盟真係夢想成真。我喺心態同身體都已做好準備，接受新挑戰。」占士由法甲亞軍摩納哥加盟，用咗8,000萬歐元（約84億港元）轉會費，成為全球第4高身價球員，僅次於隊友巴利、C朗同巴塞前鋒蘇亞雷斯。埋單計，新銀河鑑隊值3.75億鎊（約49億港元）。
沙維留效巴塞多隻牌
皇馬同巴塞上季失落西甲冠軍，今夏齊齊瘋狂擴軍，皇馬簽入占士同卻奧斯，已經用咗1.1億歐元。巴塞重槌用9,450萬歐元買蘇亞雷斯外，仲有克羅地亞中場拿傑迪錫同智利門將哥迪奧巴禾，皇馬7至11號粒粒皆星外，巴塞亦都唔弱，由7號仔開始計為柏度洛迪古斯、恩尼斯達、蘇亞雷斯、美斯同尼馬，柏度仔雖然名氣爭少少，好彩6號仔沙維願意留隊多一季先轉投紐約城，中場都叫多番個大將。
另外，皇馬周三已經飛抵美國洛杉磯，備戰國際冠軍盃，好似比比、法比奧干查奧等葡萄牙兵已經歸隊，右閘艾路比亞練習期間巧遇NBA紐約人前鋒安東尼，C朗話已經傷癒，周六同一眾西班牙國腳報到，備戰態度好認真。