《足球小將》可說是運動類動漫經典，七十、八十後可謂無人不識；屈機的衝力射球、想學踢波就要跟勞比度叔叔過巴西，還有禁區外射門的不敗傳說……每一樣都令人熱血沸騰！不過最近發生了一件更熱血的事情，就是由港人開發的戴志偉及林源三搪膠figure終於面世！數數手指，原來市面已有十多年沒有同類產品，現在$580便能買一個兒時夢想，不過初回限定機會只得300個！
記者：朱崇德
攝影：伍慶泉、楊錦文
工匠堂對香港玩具迷來說，是個頗新的名字，但頭炮就取得《足球小將》figure的香港製作版權，着實厲害。半年前，負責人梁樂至同大家一樣只是個玩具收藏家，「從小就對《足球小將》有情意結，同公司另一位負責人施家暉一樣，由細到大都睇佢嘅卡通、儲佢嘅玩具。大個儲咗幾年錢，就膽粗粗試吓攞版權做玩具。」
美日搪膠是潮物
《足球小將》在香港玩具市場是極罕之物，經營玩具生意20多年的超人黃說：「近十多年，都未見過《足球小將》figure，最多都是精品或T-shirt。好多行家得知工匠堂出搪膠公仔嗰陣，才發現這段真空期，真係後知後覺。」搪膠的特點是耐放，而且近一年來，搪膠文化在日本、美國等地變成一種潮流：「美日好多大廠都推出搪膠公仔，買嘅多數係潮人。例如大廠Medicom就推出搪膠鐵甲萬能俠，造型唔算靚，但好raw、好有懷舊味道，包裝是一塊紙牌連一個膠袋，營造番細個喺士多買玩具的感覺，但每隻定價可以高達過萬円，隨時貴過超合金魂。不過數量偏少，所以很有收藏價值。」
Baby Fat有卡通味
Unbox乃製作《足球小將》figure的公司，也是大家抱有信心的原因。他們曾製作海綿寶寶及Michael Lau的玩具，就連日本國寶級的孖寶兄弟及薩爾達figure，都曾出自其手筆。梁樂至說：「同日本方面傾談製作版權花咗約三個月，過程有啲似坐過山車，患得患失，不過憑誠意及製作團隊嘅充足經驗，最後都成功咗！」《足球小將》漫畫入面的手腳比例十分誇張，雙腿極長，如果做成action figure感覺會有點奇怪，太似真人又會失去卡通神髓：「所以我哋用咗搪膠，感覺有啲鈍鈍哋，反而避開晒以上問題！不過，製作嗰陣都遇到過其他困難，例如戴志偉嘅頭髮，喺卡通入面佢嘅髮尾會跟住頭部轉動而時左時右，資料數據比較混亂，好難做得好。」他又說：「兩隻搪膠figure我哋都做得baby fat同矮啲，林源三個頭就做得大啲，出到嚟嘅效果更有搪膠及卡通味道！可以得到日本方面認可，令我哋感到好滿足！」初回限定figure合共推出300隻，戴志偉會附送隊長手帶，林源三則有寫上挑戰狀的足球。暫知短期內未必加推，現時預訂情況相當熱烈，一周內已超過200隻，fans要密切留意了。
