韓劇、韓星、韓式食肆湧港，大家樂（341）亦唔執輸，噚日宣佈跟韓國JNT集團簽訂特許經營協議，引入韓國健康餐飲品牌The Cup，成為大家樂首個韓國餐飲品牌。
大家樂首席執行官羅開光計劃，今年內在港開第一間The Cup特許經營店，暫時仲搵緊舖位，未來幾年都會逐步增加店舖數目。
The Cup喺韓國都算係幾新，2011年開業，以紙杯設計做重點，不論堂食或者外賣，都係用紙杯盛載食物，而且菜式簡單，每道菜只用5分鐘煮，又多用蔬菜，以健康、快趣做賣點。過去兩年先後喺馬來西亞同德國開設特許經營店。
其實羅開光上個月已經披露開店大計，話去過日本同韓國搵合作機會，未來5年將會引入海外品牌，開發悠閒速食餐廳，估唔到張支票咁快兌現。