噚日網民嘅討論焦點，除咗「馬賽對波圖」之外，另一張城中名人嘅舊相亦成為熱話。究竟邊個咁犀利？原來係佔中發起人戴耀廷。佢個facebook戶口上星期被封後，近日終於解封。「回復身份」後，佢開咗一個官方專頁，為免俾人冒認，佢用咗一張27年前嘅舊照做cover photo，唔少網民見到呢張相，覺得相中人同𠵱家嘅戴耀廷相距甚遠；年輕版戴耀廷，竟然有啲似《獵鷹》中嘅劉德華。
戴耀廷話呢張相係1987年所攝，佢當日拎住揚聲器，宣讀緊聲明。原來喺1987年，《公安條例》正進行修訂，戴耀廷當年有份帶領遊行，反對有關修例。咁多年嚟，唔少學生領袖都有用公民抗命方式反對公安惡法，勢估唔到，向來溫和嘅戴耀廷，原來係呢方面嘅先驅。當時嘅警隊一哥係顏理國，唔知有冇禿鷹咁鷹？
網民讚側面似哥哥
佢話嗰次係佢第一次公民抗爭經驗。「之後就不太多了，直至2013年」。今個月剛踏入50歲，睇返23歲嘅自己，佢話「感覺有點怪怪的」。感覺有幾怪呢？有網民睇到張相之後，覺得佢個學生look，好似82年播出嘅無綫電視劇《獵鷹》男主角江大偉、即係劉德華，估唔到佢年輕時咁鬼有型。亦有人覺得佢呢個側面，其實同哥哥張國榮有幾分相似。唔知戴耀廷會唔會用愛與和平，重塑當年fit爆身形？
李八方
mailto:[email protected]