食物及衞生局局長高永文為咗一網打盡工聯會六票，噚日不惜重操故業，去到陳婉嫻老巢黃大仙上邨幫手「義診」45分鐘，為公公婆婆簡單睇症。民望高講明，因為做緊局長，暫停咗執業資格，所以只可畀吓意見教啲公公婆婆點樣護理。
唔少嚟「睇醫生」嘅長者都係睇吓手手腳腳嘅毛病，食正民望高骨科嘅專業資格；有長者更帶埋自己喺醫院嘅「排隊紙」，不滿排太耐，似乎想局長幫手疏通，但民望高當然耍手擰頭。由於唔少公公婆婆係架己冷潮州人，民望高都特別同部份病人以潮州話溝通。
民望高落得嚟，保皇黨點會輕易放過佢？其他建制派包括民建聯、東九龍居民委員會等趁機大抽水，向睇完症嘅民望高遞信，要求聖母醫院加設急症室，但民望高話好難做到，唔知會唔會因此失票呢？