唔少人話呀，打麻雀對防止腦退化好有幫助㗎，但原來畫畫都一樣可以！好似患上腦退化症嘅「光纖之父」高錕咁吖，近排就愛上畫畫呢個玩意，短短半年間由唔識揸筆到畫咗幅「啟示」，畫風盡得印象派神髓。佢太太黃美芸噚日出席一個公開活動時，即席向現場人士展示呢幅大作。
黃美芸話呀，腦退化病令高錕冇咗正常人嘅距離感，初頭佢畫極都係畫空氣，好似小朋友咁坐唔定，唔夠五分鐘就四圍望，仲要Bilibala唔停口。好彩高錕都易𠱁，讚吓佢就會乖乖開心等上堂，𠵱家唔單止識畫花，就連動物、啤啤熊、飛機都難佢唔到，但畫到咁上下就要瞓覺中場休息。雖然要跟住老師畫，但佢都唔係齋聽你噏，要校啱timing先肯畀人幫手，可見高錕就算乜都記唔起，依然咁有性格。