王菲噚日同助手現身香港國際機場，啱啱落機嘅阿菲，轉個頭又上樓上搭飛機走人，認真來去匆匆！心情勁靚嘅阿菲，俾差唔多20幾個記者追訪，雖然佢強裝鎮定，但係罕有地有問有答，佢話：「我返嚟香港冇嘢做，𠵱家準備去北京，你哋小心喇，唔好咁墟冚！」
懶理前夫一拖三
有人讚阿菲細女李嫣唱歌好聽，阿菲笑笑口話：「呢啲唔答，我唔答呢啲！」聽見有人問佢返北京會唔會見前夫李亞鵬，甚至有記者影到李亞鵬一拖三睇午夜場兼返屋企，阿菲只係笑一笑。去到櫃位check in，阿菲助手問大家等緊邊個，大家講咗等張耀揚之後，即刻問阿菲識唔識佢？阿菲都係擰擰頭，甚至重提舊事，阿菲俾人懷疑係嗰個天后級女星因吸毒被捕，阿菲都係笑笑口擰擰頭！喺行去閘口期間，阿菲撞見一個喇嘛，兩人停低講咗幾句後再合十離開，機場職員見到咁多人，即刻解開啲圍欄，點知竟然嚇到清潔阿嬸揼低支地拖棍走人，阿菲即刻好似跨欄咁跳過，認真跳脫，最後阿菲醒起自己唔記得除眼鏡，嗱嗱臨除低之後入閘。
而郭富城都單拖孭住個背囊現身機場，講到呢排又發生飛機失事，城城話：「唔驚得咁多！」
撰文：馮仁昭