中國自動化（569）上年受到行頭人為性滯後的因素影響，純利跌到落五年谷底，但隨住阿爺重啟鐵路工程，投放近萬億元，中自化今年應該可以開行turbo，大翻身。
中自化係內地最大鐵路信號系統解決方案的供應商，主打控制閥項目，亦係龍頭級數。
同石油板塊一樣，阿爺上年整頓鐵路板塊，國家鐵路專案延遲，直至今年，先至大龍鳳。啱啱呢個月頭，內地相關證券報章指出，今年鐵路投資額度，有望由阿爺定調8,000億元人仔，上到稍為超過1萬億元人仔。
純利增長以倍計
又今年第一季，全國鐵路運輸業完成投資，對比上年同期，經已增加咗6%，達到713億元人仔，但係呢筆投資，僅相當於阿爺拍板8,000億元額度嘅9%。可想而知，第二季打後，阿爺就要踩行油去達標。而內地報載，今年64個鐵路項目，剩底44個，會喺下個月底前，全部批覆。
阿爺落重注，兼快馬加鞭，中自化作為其中一個行頭大哥大，有運行之餘，亦應該會越嚟越好。
中自化上年純利，跌到得番7,357萬元人仔，基數細到可憐，亦諗到，只要一turnaround，增長會好快爆炸。場內的專業評估，估計中自化今年由原先eps0.294港元，調整到最新0.23港元。即使係咁，專業評估都認為中自化今年純利，有條件倍數增長，追番上2011年eps水位，預測PE跌到得6.8倍。
但係中自化現價（1.57元），深陷2007年上市以嚟，近七年超殘低位，比起2011年嘅7蚊，仍然係跌咗78%。當翻半番到2.3元計數，今年PE得10倍，亦未有耐上到當年7蚊高位。
錢雋
細價股專家
本欄逢周二、三、五刊出