謝拉特退出英格蘭國家隊後，外界最關心邊個接手做「三獅軍團」隊長。喺英軍無大將嘅情況下，其實下任隊長人選都好明顯，相信都係朗尼居多。連謝拉特自己都暗示，佢已經欽點咗朗尼做接班人。
為國家隊貢獻咗14年，34歲嘅謝拉特決定退落嚟，周一透過英足總宣佈退出英格蘭國家隊，專心幫利物浦比賽。謝四退隊，意味住英軍隊長一職懸空，副隊長林柏特仲比謝拉特大兩年，應該唔會接任，相信下任隊長會喺一班正值當打之年嘅球員入面挑選。
英格蘭近年人才斷層，選擇唔多，揀得落嘅真係得朗尼一個。雖然朗尼本身都唔係好，腳下工夫同體能都有啲退步，但唔揀朗尼仲有咩人揀？放假同韋舒亞一齊狂歡嘅神經刀門將赫特？定係加利卡希爾？我求大俠揀唔落手囉。
退役謝四勁讚世界級
謝四其實都講得好白，話自己最鍾意朗尼，「如果領隊佢哋需要我對任命新隊長嘅睇法，我樂意畀意見。我相信鶴臣會搵到個合適嘅人選，而新隊長亦會尊重呢份榮譽。雖然我離開咗，但國家隊仲有唔少有經驗嘅球員，例如朗尼、赫特、格連莊臣同埋加利卡希爾，佢哋都有一定資歷。」喺訪問中，謝四多次提到朗尼，似乎佢特別欣賞呢位後輩，「我好享受喺國家隊同一啲世界級球員並肩作戰，朗尼係其中一個，仲有林柏特同泰利。」
鶴臣曾預言朗尼接棒
如果謝四呢番暗示仲唔夠清晰，英國《太陽報》有篇更直接嘅報道，佢哋引述謝拉特身邊嘅人士話：「謝四嘅選擇係朗尼。佢好清楚朗尼有幾想做隊長，仲希望朗尼可以成為一位傑出嘅隊長。朗尼充滿激情，可以傳承英格蘭嘅精神，成為其他球員嘅榜樣。」其實朗尼呢個隊長位都應該冇走雞，因為喺半年前，連領隊鶴臣都話過，「朗尼係未來嘅隊長，當謝四退役後，就輪到朗尼接棒。」仲有白賴仁笠臣同舒利亞兩位英格蘭名宿，都力撐朗尼係新隊長嘅最佳人選。唉！估唔到除咗香港所謂嘅特首「普選」冇得揀候選人，連前宗主國英國嘅足球隊隊長都係焗揀！