盛品儒早前帶整容𡃁模郭奕芯（Ashina）灣仔夜蒲，兩人醉爆又啜爆，盛品儒澳門有米女友蔡一鳳急急爆分手劃清界線，他事後知錯馬上做大龍鳳箍煲。盛品儒昨孖蔡一鳳出席動漫節宣傳，並公佈「一品戀」明年拉埋天窗。
蔡一鳳昨在facebook貼了有關她結婚消息，並留言：「逼婚都有嘅，你犀利，服了！」盛品儒同時也在fb分享蔡一鳳連結再風騷說：「得米。」兩人隔空打情罵俏，友人留言祝福。兩人昨還拍拖到灣仔出席動漫節宣傳，大做恩愛真人騷。
飛起Ashina
盛品儒又即場向蔡一鳳講愛的宣言：「Michelle（蔡一鳳）喺我心目中係最愛，我哋感情會更堅固。」蔡一鳳左手中指戴了一枚約5卡、近百萬元巨鑽，疑似訂婚戒指，她否認：「未係。」盛品儒施口術冧女：「我有連串行為，𠵱家事先張揚。」他笑言會到女友店中選購。問到盛品儒是否會修心養性，他說：「向來都係，上次飲醉酒係我錯，我承擔。」盛品儒還飛起Ashina做show girl，將用全男班，他揶揄Ashina：「上一次宣傳邊個得着，大家有眼睇。」至於婚期，他自爆：「今年趕唔切，2015啦。」
否認離過婚
「一品戀」明年結婚，昨有讀者報料蔡一鳳曾離婚和整容，蔡一鳳昨在電話說：「我平時都唔係得罪好多人呀？唔係事實我唔回應啦。」蔡一鳳強調沒離過婚：「如果係，我喺澳門擺酒，點解佢哋唔拎相出嚟。」蔡一鳳同時否認是太陽城集團主席周焯華的表妹，她說：「我只係佢partner表妹。」Ashina昨向「一品戀」送祝福：「佢（盛品儒）呢個年紀結婚係好事，我同佢冇聯絡啦，佢要乖乖哋。」
採訪：陳杰、黃曉妍
攝影：沈健程
