喺香港各個唔同景點「毅行」，兼去過不同傳媒機構「踩場」後，紙糊熊貓終於要「佔中」嘞，喺8月3日前分批「留守」置地旗下嘅交易廣場中央大廳、怡和大廈大堂同置地廣場西橋，陪住港人喺政改年炎夏「作戰」。有市民卻發現，一隻身上寫住「真普選」嘅熊貓，竟然離奇喺怡和大廈大堂「被消失」。堂堂「國寶」想要真普選都唔畀？置地唔驚阿爺責難咩？
點解國寶都會爭真普選？佢哋並唔係早前展覽個批嚟自法國嘅紙糊熊貓，而係made in HK，清楚知道市民真正主流意見係咩囉！話說置地早前同用嚟維穩嘅「築福香港」運動合辦「香港製造」紙糊熊貓工作坊，只要市民捐助世界自然基金會香港分會，就可以DIY另一批紙糊熊貓，製成品仲會喺今個月18號開始展出。
市民鬧爆侵犯言論自由
攝影師楊必興就喺網誌爆料，話今個星期日去怡和大廈影呢個展覽時，發現咗一隻背脊寫住「真普選」嘅民主熊貓，當然舉機影低民主熊貓佔中嘅歷史性時刻啦。點知周一（21日）重臨怡和大廈時，竟然發現呢隻同港人一齊爭取真普選嘅熊貓已經消失咗，莫非都係同7.2留守中環嘅爭普選人士一樣，已經被抬走？
八方昨重返現場，按楊必興嘅相片搵，「真普選」熊貓確係唔見咗。咁啱撞到一位喺度影熊貓、網名NAHAHA嘅市民，佢話周一早上11點45分嚟影相，仲影到一隻正面寫咗「689」嘅熊貓，之後花咗10分鐘跑出去影熊貓背面，點知就唔見咗嗰隻熊貓，「我對番楊必興影相嘅位置，原來隻『689』背面就係寫『真普選』，應該係咁啱嗰十幾分鐘俾人搬走咗！」有網民仲發現，另外有隻背脊寫住「佔中」嘅熊貓都冇埋。
楊必興喺網誌慨嘆，置地唔知係咪因為熊貓嘅強烈政治取向移走佢，抑或佢因為「佔中」被香港警察抬走呢？NAHAHA都覺得此舉侵犯原創者嘅言論自由，唔知創作人會唔會要求置地物歸原主？八方都問緊置地為粗暴抬走佔中熊貓，截稿前未有回覆。
李八方
mailto:[email protected]
