地產發展商推新盤，樓盤名好多時成為市場吹水焦點，不過好似越改越冇創意。好似早排新盤名鍾意崇洋，齋玩英文名，包括太古地產（1972）何文田Dunbar Place、信置（083）九龍城The Avery、長實（001）北角DIVA。玩完英文，最近就變咗玩冧巴盤。
好似新地（016）即將喺8月推出市場嘅將軍澳天晉第3期，就叫「天晉IIIA」就算數，話係之前1期同2期嘅延續喎，又例如華置（127）喺西營盤個項目叫「南里1號」。不過都好過大昌（088）山頂賓吉道3號，事關呢個樓盤就咁將地址搬字過紙當做盤名，誠意欠奉。
發展商可能怕樓盤被改花名，還原基本步，好似長實當年將日出康城第3期改名緻藍天，後來被網民指鄰近堆填區，譏為「致癌天」，又或者新地屯門瓏門，被指「守龍門」，即買入後，有排你守呀！