朋友Basil去書展時見到一個書架，望一望堆書名，就情不自禁影低咗。千頌C見到張相，當堂嚇一跳，然後得啖笑！小學大家都有做過「排句成段」練習，即管試下將書名排一排啦，好快，我看到了一段真愛。
1：總裁的小秘書（主角：十級靚仔總裁及平民小秘書邂逅）
2：偏偏不愛總裁（小秘書一開始，誓神劈願話唔會鍾意總裁）
3：進擊的總裁（點知總裁發動猛烈攻勢！）
4：說好不愛總裁（小秘書冧左，但心諗：「唔得架！講好唔可以鍾意總裁！」咁諗得，即係中招啦！）
5：總裁強愛你（小秘書多次拒絕，但總裁仍死心不息。知啦知啦，知小秘書你係被動啦！）
6：真愛歡迎光臨
你以為總裁系列只係得咁多？咁你就太睇少文化產業嘅創造力啦！上個出版社網頁一Check，竟然發現「總裁系列」多達1394本！（真係好癲，總裁會唔會太忙？如果每一本書係一次一日嘅戀愛，就要3年10個月先完成），要咩書名有咩書名，仲要有唔少係「18禁」！封面上嘅總裁，當然全部極度靚仔（唔係話想讚盛品儒，但有本書個封面真係好似盛品儒）。
千頌C好相信市場力量，有咁多「總裁」供應，絕對係因為市場有需求。韓、台偶像劇Sell咩？講到尾，個個故仔都係講幾個「高富帥」同時追一個女仔，然後等云云眾女自己代入女主角。《來自星星的你》就仲屈機，都敏俊不單止高富帥，仲要識超能力！你玩晒啦！咁一本書，要引到呢班毒女俾錢買，就先要Sell「靚仔」，咁畫個封面就得啦；咁要表達「有錢」，唔通用「有錢人強愛你」、「說好不愛土豪」、「進擊的有錢佬」咩？So Cheap，「總裁」兩隻字，講完！
唔係話唔可以睇呢類書，但如果「中環十一少」認為手遊股「只係追求快感嘅課外活動」，咁樣千頌C相信，呢個系列就係女書迷嘅「手遊股」，睇得多，冇益。
至於呢批「手遊股」幾多錢？最平44蚊，係台幣，買夠10本仲有85折，會員仲可以10日內退貨。幾乎唔使錢，就可以同唔同嘅總裁，愛得轟轟烈烈…天荒地老…那麼瘋癲過，那麼珍惜過，那麼動地驚天愛戀過…諗落，又幾抵。
不過當諗到現實中嘅總裁…嗯…大家都係唔好玩咁多「課外活動」，努力工作吧。
「總裁系列」有成1394本，實不能盡錄，以下為部份書名：
《總裁的悔過書》
《溫柔總裁的愛情詭計》
《收服浪子大總裁》
《總裁套牢小秘書》
《惡總裁的傻情人》
《收留總裁》
by千頌C@堆填區