港大民意研究計劃噚日公佈十大立法會議員支持度排名，9位連續上榜嘅議員中，七人評分上升，升幅最多嘅係白鴿黨何俊仁，佢以42.7分排第七，評分較4月時升3.7分，排名亦跳升一級；由於呢個訪問咗逾千市民嘅調查喺7月中進行，即係鐵頭仁7.2留守中環兼被捕後，唔通俾警察抬一抬，人氣都急增？啱啱出獄嘅長毛梁國雄評分亦升2.2分，以37.9分排第八；白鴿黨劉慧卿評分增幅亦係第三高，較三個月前升咗2分至48.6分，由第五躍升至第四位。經常寸爆狼英嘅主席曾鈺成以59.5分續排榜首，新民黨葉劉淑儀以52.3分緊隨其後。民建聯譚耀宗雖然排第六，但評分跌至44.8分，係20年來個人新低。